政情:戴健文執死雞做廣播處長?

煲呔曾夕陽政府等收工,民望低落,搞到好多有識之士都唔想走入呢個熱廚房,費事無啦啦畀人連累摧毀個人聲譽。遠嘅唔講,好似商務及經濟發展局咁,前局長劉吳惠蘭因病辭職後,兜兜轉轉都係由未夠班嘅副局長蘇錦樑坐正,無奈到極。據聞呢個執死雞嘅情況隨時再出現,今次輪到一向麻煩多多嘅香港電台,有傳廣播處處長一職會由不受政府歡迎嘅署理副處長戴健文出任。

廣播處處長一職,去年十二月已經開始招聘,遴選至今先後傳出過幾個人選,包括某傳媒集團高層、前政務司司長許仕仁嘅前新聞秘書關鄭麗敏等,即使戴健文榜上有名,亦都只係大冷之選,根本冇人估過佢會成功登位。據聞政府做出呢個決定都好無奈,皆因戴健文本身一直都被視為兩位前廣播處長張敏儀同朱培慶呢啲前朝嘅嫡系人物,政府當然唔想搵返港台人管住呢個獨立王國啦!

政府萬分不願 無奈接受

雖然萬分不願,但亦無奈接受,始終廣播處處長個位唔可以長期懸空,加上港台每個變動都有機會觸發政治危機,故此就算政府點唔想都好,都一定要搵個正式處長返嚟,至少做起事來都可以名正言順。其實政府希望搵外來人鎮住港台已經唔係新聞,可惜一直冇外界精英願意接手呢個燙手山芋,夕陽政府無計可施,結果造就戴健文有機會步佢上司蘇錦樑後塵執死雞,真係眼冤。

對於戴健文有機會坐正,港台內部員工當然笑到收唔到聲啦,個個歡天喜地以為獨立王國重臨。不過,有較為清醒嘅港台人分析,即使戴健文有機會坐正,港台亦唔會好似以前咁自由,因為成個港台早就畀政府大改組,以後做乜都遭受制衡,事關有個太上皇顧問委員會住,對下就開多個由政務主任出任嘅副處長位,所以戴健文坐正係唔係咁好做,大家心裏有數。

戴健文同署理廣播處長梁松泰尋日出席港台活動時,就被問到對於戴健文做處長嘅消息有何回應?梁松泰冷笑幾聲,不作回應;至於戴健文就叫記者問番政府喎,又強調自己冇收到通知,總之乜都話唔知。

啱嘅,唔講嘢就係最好,否則見光死冇得執死雞就弊喇。

Money18免費即秒股票報價網站現推出8升級功能,財經資訊,實時實發!