中環出更：郎朗做火炬手 唔知跑去邊
以國際知名鋼琴家郎朗為名嘅「郎朗國際音樂基金」搞咗個青年學者獎勵計劃，尋日就宣布兩個得獎學生名單，郎朗都有出席以示鼓勵。卓妮聽聞郎朗今日會做深圳大學生運動會嘅火炬手，諗住問吓佢準備成點，點知佢貴人事忙，話連跑邊都未知，咁今次咪要臨急抱佛腳？
為得獎學生提供鋼琴指導
深圳大運會將舉行兩場火炬傳遞活動，今日係第一場，會有二百一十一個火炬手參加，郎朗係其中一個，另外仲有港協暨奧委會義務副秘書長霍啟剛、藝人曾志偉等。雖然今日就要跑，但郎朗就連跑邊一段都未知，事關佢最近忙緊出碟，真係分身不暇。不過，佢話平時都有做開健身，應該冇問題喎。
至於尋日得獎嘅學生來頭都唔小，其中十歲嘅李欣潼兩年前已考獲鋼琴八級，成績仲要係distinction（卓越），佢同九歲嘅楊雋都係喺芸芸四、五十個競爭者中脫穎而出，郎朗會為佢哋提供兩年鋼琴指導，尋日已經即場陪佢哋彈琴，仲好肉緊咁指手畫腳，相信兩位小朋友必定進步神速啫！