中環出更：投李小龍珍品黃錦康豪不手軟
已故一代國際武打巨星李小龍嘅十三件珍貴遺物，尋日首次喺香港公開拍賣，拍賣總額接近一百八十萬元，其中李小龍喺電影《死亡遊戲》試鏡時着過嘅深藍色毛皮襯裡中國式長外套，就由一位美國買家以六十萬元投得，成為最高成交價嘅物品。同樣係李小龍迷嘅美聯物業副主席黃錦康，佢就用咗接近三十萬元投得五件心頭好。
近30萬投五件心頭好
黃錦康話，最鍾意李小龍生前「以有限為無限」嘅座右銘，所以用咗二十萬元投得李小龍親筆簽署嘅振藩國術館學生會員卡。佢解釋話，截拳道係李小龍獨創嘅武術概念，卡片上印咗截拳道嘅陰陽標誌同座右銘「無方法為方法，無限制為限制。」黃錦康揚言，呢件拍賣品對佢係志在必得嘅，所以佢由底價四萬元叫到二十萬元都「豪」不手軟。
除咗學生會員卡外，黃錦康仲投咗李小龍兩封信件及三張印有太極圖案嘅功夫卡片，佢大呼今次拍賣品樣樣都好抵同物超所值，又話今次係香港第一次搞李小龍拍賣會，所以點都要嚟買啲嘢畀自己喎，佢希望將投得嘅戰利品送畀同佢一齊「打江山」嘅同事，鼓勵大家要秉承李小龍嘅精神，不斷挑戰自己極限，追求卓越。
李小龍喺電影《死亡遊戲》試鏡時着過嘅深藍色毛皮襯裡中國式長外套，就由美國買家Greg Manning用六十萬港元投得，佢話自己好鍾意睇電影《死亡遊戲》，今次投到件衫真係好開心。其他拍賣品仲包括李小龍親自撰寫嘅拳譜《蔡李佛功夫》、《六路短拳》，以及參照李小龍電影《龍爭虎鬥》入面嘅雙節棍等複製品。
卓妮