自稱「政治家」的煲呔曾落雨收柴，為最後一份施政報告搞諮詢，忙得如嗡嗡嗡的小蜜蜂，一時飛到東見港區人大代表、政協委員，一時撲到西諮詢不同界別及團體意見。夕陽政府最後一秒才發憤圖強，遲唔遲啲呀？
政治家畢竟不同文學家。文學家像亨利‧米勒，喜愛他的讀者說他的書可以從任何一頁讀起，任何一頁都是雜花生樹，群英亂飛，賞心悅目之至；政治家如果去到最後先肯扮吓忙，然後臉不紅氣不喘地說「只要提出的政策到位，及回應市民訴求，相信下屆政府會繼續採用」，咁嘅所謂「政治家」點會做得到實事，等香港市民會永遠紀念佢？
古代雅典最偉大的政治家伯里克利彌留之際，朦朧中聽到朋友在數他的豐功偉業和高貴品質，如曾在九個敵國的領土上建立了勝利紀念碑，其管治下保持了雅典的繁榮，他卻喊道：「你們忘記了我最傑出的榮耀，盡說那些主要取決於命運的尋常功績。你們沒有提到，從未有一位公民因我而披喪服。」這是一種信仰，在如此長期統治下，仍然能夠不為私利，不願犧牲哪怕僅僅是一位公民的生命，確實可貴。
當政治蛻變為宣傳，便只會有政客而沒有政治家。政治家既有原則，亦有信仰，可政客兩樣都冇。煲呔曾治港七年，民怨沸騰，政策朝令夕改，一味吹水搞形象工程，稍留意政情的讀者，必能如數家珍般數臭佢。坦白講，煲呔曾政治家嘅貴族氣質老朽睇唔到，只見佢常黑晒塊面，庸俗之至。