競爭條例草案係商務及經濟發展局局長蘇錦樑（Greg蘇）任內最重要嘅工作，但由於條文內容太辣，由始至終都得唔到工商界支持，廠商會立法會議員林大輝更要求當局撤回草案。相比之下，中華總商會會長蔡冠深就溫和得多，佢要求Greg蘇聽多啲中小企嘅聲音，否則對中小企有好大影響，即係對香港經濟有好大影響喎！難得蔡會長好言相勸，Greg蘇真係要好自為之喇。
