政情：平叔斥後生仔唔讓座
最近有外國傳媒數臭港人坐公共交通工具嘅十大醜態，估唔到外號「庸官殺手」嘅前高官王永平都有共鳴。平叔日前喺電台節目上批評，港府猛推國民教育，後生仔淨係識唱國歌，但就唔識得守規矩、尊重長者，好似搭車唔會讓座，而且仲一人霸兩個位，倒不如先搞好公民教育好過。
平叔之所以咁㷫，原來佢有切身體驗，佢話自從退休後無政府車坐，變成一個無車階級，巴士、小巴、港鐵乜都會搭，經常喺車廂內困獸鬥，乘客唔肯行入啲嘅情況，令佢印象深刻。平叔又話，最睇唔過眼就係啲年輕人唔識讓座，有長者訴苦，話有時寧願先坐去總站上車，以便有位坐。
其實平叔講得好有道理，發生喺公交嘅醜態必須糾正，同埋教育市民要讓座給有需要人士。不過，呢啲醜態存在已久，可能平叔以前坐政府車舒服慣，依家一下子要適應乘搭交通工具嘅新環境，所以有咁大感受。