政情：連納智暗寸港府做嘢慢
西九文化區新任行政總裁連納智，尋日親身落到西九海濱長廊視察，原來佢三年半前已經去過西九，所以佢好驚訝話，估唔到今時今日嘅西九一啲都冇變，暗寸港府做嘢慢。連納智話，希望盡快展開最後階段公眾諮詢，佢來港前亦已經同西九設計師Norman Foster見面討論細節，有望年底可以提交城規會審批。
連納智尋日喺酷熱天氣警告下，無懼高溫去到海濱長廊巡視，仲戴住頂太陽能帽宣揚環保，佢形容西九極具潛質成為世界數一數二嘅文化區，看似滿腹大計。不過，佢會唔會好似上手咁做唔夠半年就劈炮？連納智話做CEO係一個好難得嘅機會，亦好愛香港呢個城市，仲透露老婆同女兒好快就會來港搵佢，所以好有信心做得長喎！
來自澳洲嘅連納智雖然唔識講廣東話，但認為香港係一個國際城市，唔擔心同文化界溝通唔到，但都會學少少廣東話傍身，佢仲即席解釋佢嘅中文名，話係「連續累積智慧」嘅意思，盡顯風趣嘅一面。