政情：羅致光變質幫政府把關
走進權力核心係唔少政治人物嘅目標，正可能因為咁，港府近年經常用「泛民制泛民」策略，不時分派要職籠絡站喺泛民主派邊緣嘅民主黨，等佢哋一嘗權力滋味。好似有白鴿黨「大腦」之稱嘅羅致光，就做咗關愛基金執行委員會主席，而黨副主席單仲偕亦係西九文化區董事局成員。不過，兩人擁有權力後就「變質」力撐政府，甚至倒戈相向，搞到黨內部對呢啲籠絡要職又怕痕、又怕痛。
單仲偕主理西九變負累
特區政府明年就換屆，據聞白鴿黨早已同其中一位疑似特首候選人眉來眼去，仲有傳聞話該黨已獲預留兩、三個局長、副局長位，以便拉攏泛民。羅致光、單仲偕二人就係大熱人選，據講佢哋依家被委以重任，正係想示範畀中央睇此舉行得通。不過，白鴿黨內部有人好不滿黨員加入政府諮詢組織，因為組織推出乜嘢政策，最後無論好與壞該黨都要焗住支持，衰嘢就要硬食死貓。
有人以關愛基金為例，話羅致光做執行委員會主席都係得個名，好難有話事權，所以早前關愛基金搞出資助遊學團呢啲古怪諗頭，白鴿黨都要硬食，就算黨內幾大反對，投票時都要支持撥款，免得被人批評唔撐自己人。至於單仲偕主理西九，就算行政總裁突然「走佬」，白鴿黨仍輕輕帶過，無大力狂插，證明加入建制，只會令白鴿黨兩面不是人。
其實有部分資深黨員，認為白鴿黨做咗十幾年反對派，係時候加入權力核心，加上如果部分立法會議員「升級」走入建制，會令第二梯隊更容易上位。不過，黨主席何俊仁早前喺內部會議講明，一日無真普選，該黨都唔會入閣，入閣包括行會成員、局長、副局長及政治助理，一盆冷水淋落想做局長嘅黨員頭上，睇嚟佢見到兩個反面教材，都唔想黨友加入權力核心，繼而被權力腐化而變質。
選舉在即，白鴿黨都好緊張個黨嘅形象，前總幹事陳家偉爆出「香檳尋歡記」後，該黨就搵番三年前退黨嘅林卓廷回黨接手救亡，尋日正式上任。林卓廷過去三年做廉政公署調查主任，但當陳家偉出事後，該黨即刻高薪挖角請佢回黨，仲幫佢倒貼一個月代通知金畀廉署添，真係聞所未聞。