中環出更：阿Paul食晏首選「梅夫人」
要喺中環區「搵食」真係唔容易，每逢午飯時間啲餐廳都爆晒棚，所以好多名人都選擇到會所食晏，尤其係一班立法會議員。旅遊界議員謝偉俊（Paul）去年喺一位局長介紹下，加入咗位於花園道嘅梅夫人婦女會（The Helena May），自此呢間私人會所就成為阿Paul經常打躉嘅地方。
具百年歷史
梅夫人婦女會滿有殖民地時代建築風格，至今已經有近一百年歷史，據阿Paul講，呢間會所當初成立目的係為啲歐洲籍單身職業女性而設，裏面設有宿舍，為呢批女性提供住宿嘅地方。時至今日，當然所有國籍女性都可以入住啦！
阿Paul奉行健康飲食主義，所以平時午餐都食得好簡單，餐湯加上一碟沙律又一餐，佢最鍾意啲食材夠新鮮兼款式多，如果招呼朋友嘅話，又可以開支餐酒，日日食都唔會厭咁話，你話阿Paul係唔係好識歎先？
卓妮