中環出更：外傭爭居權 李宗德：唔合理
外傭居港權案件將於本月下旬正式開審，社會各界都好關注法庭嘅判決對香港可能造成嘅影響，而大部分都有外傭打理家務嘅工商界人士都金睛火眼
實，事關首當其衝要畀最低工資外，外傭更可能辭工轉行添！卓妮尋日喺中環遇到全國人大代表李宗德，佢個人認為外傭以工作簽證來港，所以給予外傭居港權係唔合理，而且對社會造成負擔。
不過，李宗德對判決定過抬油，事關屋企只係聘請咗兩個本地嘅兼職家庭傭工，所以點判都唔關佢事。卓妮轉頭去參加工商界活動時，又遇到中華總商會榮譽會長霍震寰，佢話外傭居港權問題相信要法院智慧去解決，但站喺佢個人立場來講，居港權要求有少少唔合理，因為外傭係來港打工，如果真係有居留權會對社會帶來負擔。
曾智明持開放態度
不過，同場嘅金利來集團太子爺曾智明（Ricky）則持開放態度，佢話即使法庭最後判成點都好，都會尊重判決，但坦言如果判外傭勝訴，外傭都要考慮係咪放棄本身國籍，況且來港打工要繳交薪俸稅。Ricky都係有情有義嘅人，講到明唔會因外傭有居港權就同家中外傭解約，會任由其外傭決定係咪申請居港權喎。
卓妮