政情：唐創時錯爆李王鍏秘密
香港考試及評核局尋日公布終極會考整體成績，呢個最後一次，肯定為考評局總經理（評核發展）李王鍏留下不滅烙印，事關佢喺全港市民、家長、老師同學生嘅目光下，被上司考評局秘書長唐創時大爆年資秘密，唐創時自知闖禍但為時已晚，相信李王鍏永遠都記得呢一日。
「你過咗三十未呀」
話說唐創時喺眾目睽睽、電視直播下，表揚考評局嘅同事幾咁辛勞、幾咁富有經驗，有啲同事更服務咗超過卅年時，突然望住身邊嘅李王鍏問「你過咗三十未呀？」全場頓時嘩然。
李王鍏受到咁嘅「突襲」，面上一陣紅、一陣黑，完全唔識反應，最後定一定神先至緩緩吐出「其實我未做夠三十年嘅，同埋我好細個出嚟做嘢」。終於知衰嘅唐創時惟有好慌張咁扯開話題，講吓會考認受性有幾高等，然後提議不如為做咗卅幾年嘅同事搞番場派對，一齊食吓嘢，並且好刻意咁再同李王鍏講，相信李王鍏無份食啦。最後更有公關好準確咁向記者澄清，實情李王鍏只係做咗二十一年，一句講晒：覆水難收囉！