中環出更：楊釗胞弟天價買澳洲豪宅
日前有報道話香港有個楊氏家族以天價二千一百五十萬澳元，即係港幣一億八千萬元喺澳洲悉尼買咗間豪宅。不過，香港姓楊嘅富豪有好多，喺卓妮明查暗訪之下得知，原來買落呢間豪宅嘅就係有「牛仔褲大王」稱譽嘅旭日集團董事長楊釗家族，主要係睇好當地市場。
洞悉美經濟唔掂？
北京嘅對外經濟貿易大學尋日喺香港舉行建校六十周年慶祝活動，楊釗都有出席。卓妮趁機問楊釗究竟係咪喺澳洲買咗豪宅，佢就直認話係自己胞弟買嘅，仲話睇好嗰邊嘅市道，而澳洲已經成為佢哋牛仔服裝生意嘅第二大市場喇。
做生意精明嘅楊釗仲話要分散投資，佢哋依家最大嘅市場係中國，因為風險少、前景好喎，相反七、八年前已經開始減少美國嘅投資。唔通楊釗洞悉先機，知道美國經濟會唔掂？佢就笑笑口話︰「當你付出一蚊，發現好難先搵番一蚊，就要諗計喇！」
卓妮