強積金管理局向來被人彈「回報低、收費高、欠透明度」，未知是否忽然禪悟，一念之仁唔想大家愈積愈唔見金，主動建議提早「回水」的恩恤意見諮詢。
呢個世界就係咁荒謬，有啲嘢必須諮詢嘅如「替補機制」，政府唔畀人鬧到飛起都唔肯推出假諮詢。當然，外國亦有不少荒謬嘅假民主，乜都攞來投票表決，如瑞士今年為幾宗「非比尋常」的事情表決：直系親屬亂倫算唔算犯法？表兄妹可不可以結婚？以旅行為名到瑞士自殺能不能入境……呢啲似中世紀話題嘅嘢，竟要花納稅人大筆錢來投票。
所以，世事無絕對，積金局改變思維，畀啲彈性大家，列出供款人在危疾、子女讀書、買樓要首期情況下，可在六十五歲之前取回部分供款應急。
有人彈積金局此舉自毀「強積金」原意，巧立名目畀市民提款，原本已雞碎咁多的強積金，退休後怎可養老？咁諗嘢就out啦，為了生活，有時連信仰都可以改變。話說警員和黑社會分子在拘留所相遇，警員說：「我和你只是職業不同。」黑社會分子說：「對，我們只是信仰不同，都是為生活奔波努力。」為生活信仰都可改，強積金算甚麼？自然可改成「軟積金」或「弱積金」，何必強人所難？
積金局其實是「為你好」，一如天下父母心，總是不管兒女是不是愛彈琴喜跳舞，總之一句「為你好」，你再哭再鬧也要學，為你好啊！為你嘅前途着想啊！如今積金局一片丹心，「為你好」多個選擇，怎可不心領？