政情：網民鬧爆鄭汝樺詐騙
溫州「和諧號」撞車慘劇發生後，內地官方傳媒最初形容係一宗「高鐵」意外，但事隔一晚後，中國鐵路局突然宣稱時速二百五十公里以上嘅列車先可以叫做「高鐵」，今次出事嘅列車時速僅得二百至二百五十公里，只算係「動車」，令人質疑有關方面故意改變定義以掩飾今次意外，亦令香港網民質疑高鐵香港段應該叫「動車」至啱。
有本港網民質疑，港府一直指高鐵香港段最高速度為約二百公里，根據內地嘅最新定義，呢條根本唔係「高鐵」，而係「動車」，不論係港府、立法會、以至大批支持同反對香港起高鐵嘅團體同市民，全部都畀內地呃晒。財委會當年通過嘅六百六十九億元「高鐵撥款」，應該正名為「動車撥款」！
有網民建議入稟法院控告運輸及房屋局局長鄭汝樺詐騙，要求港府向每名市民回水一萬元，同原有嗰六千蚊一同派發；亦有網民建議一人夾一蚊畀鄭汝樺返溫州坐高鐵。咦，其實網民係咪應該請鄭汝樺搭「動車」先至啱呢？