政情：肥胡攞新書做擋箭牌
最近醫護界好多怨氣，當局執意引入外地醫護搶飯碗，內地孕婦又頻頻出招衝擊本港公私營產科系統嘅管理漏洞，但醫管局主席胡定旭就定過抬油，尋日下午現身書展，同十幾位小豆丁講故事。
肥胡現身梗係吸引大批記者聞風而至，但佢只肯講書展嘅風花雪月，問多兩句正經嘢，佢就攞兩本醫管局嘅新書擋駕，呢兩本書分別係由四十位醫護人員合著嘅《拆走醫院的炸彈》，另一本就講癌症病人嘅飲食。
咦？現時醫院系統確係好多炸彈喎！問佢引入外地醫護人員令到本地薑不滿，應該點樣拆彈？佢話好似本書所講，最緊要大家多啲溝通，了解彼此嘅立場，咁就冇嘢唔可以解決喎。
醫管局份工真係唔易做，最近又走咗兩位女將，包括由政府過檔嘅前女AO（政務官）、做咗醫管局機構事務主管嘅王瑤琪（Ernestina)，仲有負責對外公關的Joyce楊玉雲。肥胡話，Ernestina要返屋企湊仔，歡送會當晚仲唔捨得到喊起來。當務之急，肥胡要搵番啲得力幫手，但聽聞獵頭公司一講醫管局，唔少人都話咪搞。