政情：睇死煲呔冇料 常秘鬥買樓

黃鴻超新增持兩物業

睇番班高官最近提交嘅利益申報，我哋發現素來投資有道嘅教育局常秘黃鴻超，喺鴨利洲買入咗一個單位出租，此外仲購入咗倫敦一個單位五成業權，依家裝修當中，而佢申報嘅物業總數亦由四項增至六項，可見佢相當富貴。其實黃鴻超投資物業成績向來唔錯，記得○九年佢太太王榮珍，以四千四百多萬元放售中半山愛都大廈單位，勁賺二千多萬，隨即再大手筆以三千萬買入中半山地利根德閣一個單位，一來一回帳面仍然賺咗千幾萬，認真和味。

黃灝玄應耀康齊開源

商務及經濟發展局常秘黃灝玄亦不遑多讓，半年前佢買入咗一個港島區住宅五成業權，同樣用來出租，計計埋埋，佢有份嘅物業，港島區有兩個、倫敦亦有兩個，如果佢去英國外訪，相信唔憂無瓦遮頭。

至於負責管理政府財政嘅財經事務及庫務局常秘應耀康，最新申報相比舊年無增無減，同樣有三個港島區物業，再加兩個新界區物業，但細心一睇，見佢其中一個新界區住宅，由自用變成出租，換言之為自己開源。另一方面，特首辦常秘麥靖宇就看好內地市場，選擇喺廣東省買樓自用，而食物及衞生局常秘李淑儀，則放售咗喺英國嘅出租住宅物業。

大家都記得，前排煲呔曾喺答問大會上，被議員質問到底起唔起居屋時，佢就不斷砌辭推搪，堅持喺施政報告交代，之後仲嚇市民，歐洲債務危機可能影響到本港，一派樓市會回落嘅口脗。不過，從一班常秘嘅申報所見，完全反映煲呔曾危言聳聽，睇死政府嘅復建居屋及穩定樓價措施無助穩定樓價，如果真係咁，市民買樓嘅希望就變成奢望了。