中環出更：論特首條件彤叔夠中肯
多名疑似特首候選人近期各有動作，未知花落誰家，各界都金睛火眼
到實一實，尤其係商界大孖沙。卓妮上周四下午近放工時間途經皇后大道中，又見新世界主席鄭裕彤（彤叔）着住波鞋出嚟散步，難得相逢，當然要問佢點睇近期嘅特首前哨戰同睇好邊個疑似特首候選人啦！
彤叔話無乜留意近期戰況，但就拋出特首兩大條件，第一係有能力管治好香港，其次係要搞好民生問題。至於有冇心水嘅特首人選，彤叔就話未有心水喎！講番當日，彤叔神采飛揚，由一個男職員及外籍保鏢陪同下，由中建大廈行出來，然後沿過路線橫過皇后大道中，再行返新世界大廈大本營。
暑假仲未諗去邊
卓妮見彤叔嘅職員同保鏢好細心，一人一邊扶住彤叔上落樓梯。問彤叔暑假會否同家人、孫兒一齊外遊，佢就話暫時未有計劃，亦冇諗過去邊度，但久唔久就會返吓內地喎！咁又係，彤叔向來鍾意打高爾夫球，兼且咁多波友，上去打波輕鬆吓確係百忙之中嘅一大樂事。
卓妮