可能盂蘭節快到啩，港府竟帶頭搞放生！不過，佢哋放生嘅唔係白鴿，亦唔係烏龜，而係一眾退休後急於下海搵真銀嘅高官。
冇錯，高官成日被人鬧縮頭烏龜，但係人龜始終有別，點解港府要放佢哋一條生路呢？事情要由○八年梁展文風波講起。曾經擔任地政高官嘅梁展文，一退休就不避嫌加盟地產商，搞到滿城風雨，於是咯喎，港府就大鑼大鼓成立獨立委員會，話要檢討退休高官嘅就業申請。檢討報告上年底出爐，提出廿幾項收緊規管建議，包括最關鍵嘅高官再就業禁制期亦即係冷河期，由三年延長到五年，聽落都幾係威係勢㗎。
好嘞，做完一場大龍鳳，終於輪到行政會議審議拍板。你估結果點呢？行會接納報告嘅絕大多數建議，但就唔肯接納延長冷河期，即係繼續為退休高官大開方便之門，等佢哋可以有咁快得咁快投奔私人機構搵真銀！
喂喂喂，有冇搞錯呀？高官受納稅人高薪厚祿供養，退休之後唔去做義工回饋社會都算喇，反而無視瓜田李下嘅嫌疑，急急腳走去幫商界打工，唔止影響公眾觀感，仲可能涉及利益衝突添。行會一句唔該，就將延長冷河期建議扑低，咁仲唔係官官相衞？仲唔係放生自己友？
港府點樣解畫呢？佢哋話，參考過其他司法管轄區，三年冷河期已經係最長咯喎。嗱，功夫茶唔係法律專家，但係都懂一處鄉村一處例，香港高官嘅人工喺世界上幾乎數一數二，又唔見港府同其他司法管轄區比較！香港高官待遇優厚，用意唔係高薪養廉，等佢哋退休後無後顧之憂嘅咩？依家竟然變咗高官退休搵真銀無後顧之憂，咁仲成世界！
咁啦，港府要放生退休高官吖嘛，唔係話唔得，一係就對市民講清楚，行咗幾十年嘅高薪養廉制度其實係搵笨嘅，一係就大幅削減所有高官嘅人工。嗱，如果你哋肯攞最低工資，又無埋長俸同退休金，咁退休之後即刻去私人機構搵真銀，絕對無人會反對嘅。
講開又講，高官過冷河機制根本就係形同虛設，高官後腳踏出政府，前腳即刻檻入大財團嘅例子，數到天光都數唔晒。退休高官偷步搵真銀，港府次次都做黃大仙，來者不拒，有求必應，唔怪得有人話，近年屢次爆出官商勾結醜聞，始作俑者根本就係港府自己。
不如咁啦，港府無謂再惺惺作態、自欺欺人嘞，索性送佛送到西，完全取消禁制期，話之你官商勾結又好，利益輸送又好，總之有錢齊齊搵。社會公義？市民觀感？關人個關啦！