政情：怪醫中秋追月做「老襯」
有「怪醫」之稱嘅立法會醫學界議員梁家騮終於結束王老五生涯，將於今年中秋追月夜同僅拍拖四個月、曾經擔任佢助理嘅公關女友Cannas拉埋天窗，可謂人月兩圓，當晚佢哋會喺尖沙咀洲際酒店筵開四十席，招待親友同議員。
原來早幾日怪醫先至同未婚妻去澳門影結婚相，據講選擇到澳門係因為當地有歐洲風味，唔使飛去歐洲咁遠喎。
話冇床位唔生仔
雖然做咗幾年議員嘅怪醫見過唔少大場面，但提起終身大事，佢咁大個人仲好怕醜，婉拒透露同女友點樣撻着，仲叫記者唔好咁八添。講到造人計劃，更加話依家好難搵醫院床位，遲啲先算喎。現時距離怪醫嘅婚禮唔夠兩個月，據講仲有好多婚禮細節都未搞掂，除咗未搵新愛巢外，連伴郎都未搵到，因為佢好多同學好友都結晒婚，所以搵伴郎都幾頭痛。
新娘子Cannas就話，兄弟團差唔多組成，都係怪醫嘅中大同學，依家已經係名醫，包括李德成、榮潤國、李永康等，而姊妹團成員就係Cannas嘅朋友及昔日嘅記者好友，大部分都美貌與智慧兼備。至於度蜜月，Cannas就話會推遲到今年底出發，所以目的地就遲一步先至諗喎！