政情：議員免費遊日僧多粥少
日本大地震發生轉眼已經四個多月，雖然話時間係治療傷痛嘅最好方法，但港人去日本旅遊嘅復甦程度，始終都難復當年勇，為振興旅遊業，日本有關方面近月頻頻安排着數訪問團。立法會食物安全及環境衞生事務委員會尋日就有份急件，話日本駐港總領事計劃邀請該會包括主席在內嘅三名成員訪日四天，預定喺九月廿六日起行。
話明係邀請，日本政府承諾會畀晒議員嘅機票、住宿、膳食、當地交通及保險等費用，等議員過去親身視察，更加了解嗰邊嘅最新情況。成個團包食包住，聽落都幾吸引，但依家仲要等內務委員會通過，成事嘅話，每人仲會有千二蚊嘅標準膳宿津貼額，用嚟買吓飲品同食幾碗麵都應該夠嘅，但如果要去Shopping嘅話，就要自己畀錢喇。
由於免費團名額只得三個，仲要係計埋主席張宇人個位，其餘兩個位就要由副主席黃容根同十一個委員傾掂佢。不過，核輻射遺害好難喺短時間內完全消除，班議員滋陰又補腎，係咪夠膽過去訪問都成問題。