政情：煲呔曾又做無間道？
做無間道（臥底）已經係一件難事，喺政壇做無間道就更困難，有辦你睇，煲呔曾呢個無間道次次送彈藥畀泛民都露晒底，遠嘅唔講，單講近期推出替補機制就係最佳例子。廿二萬市民七一上街逼令政府就替補機制做諮詢，點知尋日出爐嘅四個諮詢方案爛到極，令泛民主派群起攻之。區議會選舉臨近，推出爛方案等同向泛民大派政治彈藥無分別，睇怕建制派今鋪真係有得震、無得瞓。
其實政圈對煲呔曾係無間道嘅傳聞一直甚囂塵上，事關佢每次都喺重要時刻為建制派添煩添亂，例如早前決定向市民派六千蚊已經搞到一鑊泡，今次替補機制都唔例外，話就話係諮詢，但四個方案都熟口熟面，毫無誠意，分分鐘連法律基礎都站唔住腳。現時距離區選只有四個月，如果建制派同民意背道而馳，硬撐替補機制，分分鐘喺區選畀泛民㩒住嚟打，選情十分嚴峻。
白鴿黨抽水挽形象
泛民陣營喺煲呔曾手上接過彈藥後，即刻將槍頭瞄準建制派，絕不留手。白鴿黨李永達建議，泛民會喺九月區選報名時，正式向支持替補機制嘅建制派開戰，同時開動兩條戰線，首先一百二十五個泛民區選候選人，會喺自己嗰區擺擂台陣，邀請建制派區議員辯論，逼佢哋現形，令區選全面政治化。另一條主戰線就由各泛民黨魁出戰，同力撐替補機制嘅梁美芬、葉劉淑儀等獨立建制派辯論，要求佢哋喺大是大非嘅問題下，盡快表態。
同樣係白鴿黨嘅劉慧卿更有奇想，話不如索性再嚟個「變相公投」，喺區會選舉嘅投票單上，加個反對替補機制嘅「格仔」，等選民自己揀，到時有幾多人支持、幾多人反對，一目了然，而且唔會增加公帑，合晒政制及內地事務局局長林瑞麟嘅嘴形。今次白鴿黨咁緊張區選，睇嚟佢哋都心知肚明，因為前總幹事陳家偉早前爆出「香檳尋歡記」後，該黨形象勁插水，要透過狙擊替補機制搶分至得。
不過，據聞建制派最驚唔係今次替補機制，因為煲呔曾十月發表最後一份施政報告，好可能會上演一場「終極無間」，推出一啲「超錯」政策出嚟，等同送個炸彈畀建制派，如果係咁真係凶多吉少。