中環出更：食肆老闆齊呻通脹難頂
物價上升，小巿民百上加斤，老闆們都唔多輕鬆，卓妮早幾日喺一個活動上，聽到幾位老闆講起近期生意都悲喜參半。
幟哥最驚標準工時
本港食肆因為通脹同最低工資法例令經營成本大增，連近年紅爆電視飲食節目嘅「幟哥」黃永幟都坦言旗下酒家生意難做，要親自出外搜購食材，希望減低成本，難怪佢忙到一星期只得一日陪家人囉！
幟哥話，飲食業經歷最低工資後，依家最驚就係政府會就標準工時立法，一旦落實，到時就要增加人手。大家咪以為幟哥唔捨得畀人工，實情係好難請人，佢話旗下食肆人工算係偏高，所以唔受最低工資影響，唯獨洗碗雜工呢啲職位，出到成萬蚊都無人肯做，萬一落實埋標準工時，相信更難請人喎。
同樣做食肆嘅郭志怡（Bonnie），都話通脹好厲害，旗下中菜部嘅海鮮都無奈要調整價錢，但其他食品價錢就維持不變。Bonnie嘅經營之道，係唔會將貨就價，因為貨唔靚，客人一食就知，所以選料一定要上乘，咁認真製作，難怪客似雲來，佢仲話依家搵緊地點，唔排除會再擴充添！
卓妮同場又見到「蘭桂坊之父」盛智文，佢話正積極開拓內地巿場，繼青島之後，都計劃喺杭州、海南開設蘭桂坊。港人除咗飲食之外，仲鍾意去旅行，尤其係到日本朝聖。東瀛遊執行董事禤國全話，日本團生意已慢慢回復至地震前水平，加上佢哋理財好穩陣，所以面對低潮都唔使驚。
卓妮