民主黨去年同中央談判，成功爭取到超級區議會選舉呢個一人兩票方案，事後畀人質疑成個黨已經歸邊，話佢哋冇資格再講民主咁話。民主黨支持政改方案後，的確得到唔少建制中人支持，好似立法會金融服務界議員詹培忠（金勞詹），今個星期一喺立法會惜別晚宴上就捐咗十五萬元畀民主黨，嘩，乜咁大手筆呀？
有出席晚宴人士透露，民主黨副主席劉慧卿當晚拉埋另外五個黨友上台唱歌，當時大家都滿腹狐疑，為何一直唔肯開金口嘅卿姐肯唱歌呢？原來，出名豪爽嘅金勞詹見大家玩得高興，即席開出盤口，話只要卿姐肯唱歌，佢會捐出十萬元畀民主黨做經費咁話。難得金主自動送上門，卿姐自然義不容辭啦。
據聞佢哋一行六人唱咗首《我是中國人》，由於太好聽，在場人士拍爛手掌，金勞詹於是即時加碼，一共捐出十五萬元畀民主黨添。十五萬對金勞詹嚟講實在濕濕碎，最特別反而係卿姐唱埋呢啲愛國歌曲，唔通真係印證外間所言，民主黨已經轉型做愛國愛港建制派政黨？抑或只係想攞番張回鄉卡呢？