港大民意調查顯示政府三大巨頭嘅民望已經跌至危險線，原因係乜呢？主要原因當然係施政失敗啦，否則前全國人大常委曾憲梓都唔會發表「特首仆街論」，至於次要原因，功夫茶認為係強積金害死曾氏串燒孖寶兄弟。
如果大家唔明，咁就由頭講起。財爺曾俊華發表史上最廢預算案，當中最受爭議嘅係「注資強積金」，咁騎呢嘅派糖建議引起全城嘩然，事關香港人普遍覺得強積金係冇用嘅，而且要遲至六十五歲先至食到呢一粒糖。遠水不能救近火，遠糖無法解近憂，曾俊華淪為人人得而抌之嘅人肉沙包。就係咁嘅情況之下，鬍鬚曾先至轉變態度，倉卒推出派錢方案。
既然香港人普遍覺得強積金係冇用嘅，責任誰屬呀？冇錯，港府係罪魁禍首，但積金局主席胡紅玉亦走唔甩。曾俊華既然衰咗，契大佬曾蔭權冇可能獨善其身，搞到另一個姓曾嘅左派元老睇唔過眼，特首仆街論應運而生，連累幾個疑似特首候選人都被曾憲梓批死，做特首原來要預咗被鬧到變成「仆字輩街霸」。
強積金到底因乜事幹咁唔受歡迎？兩大罪狀，手續費太貴，回報率太低。胡紅玉終於話嘞，積金局將會委託顧問研究降低強積金收費，佢認為收費有下調空間喎。另外，佢仲話積金局正考慮設立恩恤制度，容許特定情況之下供款人可以退休前先提取部分強積金，例如身患危疾，或者家庭出現突變等等。之不過咁，胡紅玉九月先至向董事會提交報告，預計年底前諮詢公眾，而且制度涉及修例，相信今屆夕陽政府任期之內冇可能完成。
如果真係降低強積金收費，梗係好啦，問題只係，降低幾多先？幾時實行先？若然胡紅玉只係裝腔作勢賣口乖，完全畀唔到市民一個老有所依嘅希望，隨時會自動加入「仆字輩街霸男女混合聯誼會」㗎咋。你知啦，今時今日怨氣滿街，任何牽涉公眾利益嘅事一旦有乜差池，網上好快就有「我相信可以號召十萬人要求某某某落台」嘅群組。
如果你話鬍鬚曾嗰一份預算案係史上最廢，其實咯喎，間接反映強積金同樣咁廢，否則注資強積金唔會引起咁強烈反彈。計功夫茶話齋，積金局實實在在有必要改革成個制度，減費又好，恩恤都好，盡量令到升斗市民受惠，而唔係益晒成班蛀米大蟲一樣嘅基金經理。
總而言之一句講晒，強積金別太廢，慎防「真的憤怒鳥」追殺「金翅仆街鳥」！