笑看天下:「仆街」馳想

不久前,老朽話民間語言活潑夠爽,想不到前全國人大常委曾憲梓出席活動時罕有爆粗,談到做特首要有廣闊胸襟,突然講了句「做特首要預咗被人鬧到仆街」。呢個世界,正如毛澤東所說:世上沒有無緣無故嘅愛,也沒有無緣無故嘅恨。是以,做特首,也不會無緣無故嘅被人鬧到仆街!

煲呔曾之所以被市民鬧到仆街,係施政無方、領導無能、佢視民望如浮雲、剛愎自用、倒行逆施,加上用人唯親,其班子如「魚找魚、蝦找蝦、烏龜找王八」。如今眾叛親離,為了止蝕,都要大動作的割席,連行會成員都情願背負「抽水」惡名,數臭政府。

曾憲梓又話:曾蔭權就算被人鬧到「仆街」,都會盡心盡力完成餘下任期。這等於夕陽政府就算被人鬧到「仆街」,都會盡心盡力完成餘下任期!嘻!乜咁鬼似日本首相菅直人?菅直人又係民望插水,朝野要求佢下台之聲不絕於耳,可是,苟延殘喘嘅菅直人一味拖,還慷慨陳詞:我要戰到刀已折、矢已盡、滿身瘡痍,才會鞠躬下台。

之不過,菅直人雖戀權,可都放棄首相人工,反觀,煲呔曾你叫佢出人工少條毛都幾難。見微知著,其僭建單位被揭發至今近三個月仍原封不動,呢啲行為,抵畀人鬧仆街喇!

煲呔曾不肯放下自在,老子說「百姓皆謂我自然」,說的是從政者要把生命的真實美好,還給百姓自己,煲呔曾執政以來,灑向人間都是怨,不下台而不仆街至最後一秒,可乎?

施友朋