民主黨支持二○一二年政改方案，已經傷盡好多泛民主派死忠粉絲嘅心，該黨前總幹事陳家偉早前被本報揭發涉嫌到鳳樓尋歡，更令該黨被譏為「叫雞黨」。有網民就睇中該黨派人參加嚟緊周日嘅荃灣區議會福來選區補選，打算舉行「票債票償前哨戰」，即席向到場助選嘅該黨高層踩場「贈興」，選情都咪話唔嚴峻，隨時被工聯會執死雞。
有人喺網上討論區，號召網民到時着住人民力量Ｔ恤踩場，有網民則以「民建聯、民主黨同樣無恥」為由，促請人民力量鼓勵選民投白票，令今次區會補選儼如對白鴿黨投下不信任票嘅戰役。福來選區嘅原議員係民主黨成員，早前因病逝而要補選，今次民主黨派人參選係要攞番個位，但被對手開口埋口揶揄為「叫雞黨」，究竟對選情影響有幾深實在好難講。