政情：民主阿婆阻康叔攞大紫荊
前全國人大代表吳康民（康叔）係出名嘅老愛國，好有江湖地位，但原來前政務司司長「民主阿婆」陳方安生過去冇放佢在眼內。康叔喺最新個人著作《口述歷史》新書中爆料，指民主阿婆當年負責領導授勳評審委員會，曾經喺九八年企圖否決佢攞大紫荊勳章。
康叔話，當年大紫荊勳章人選除咗佢之外，仲有當時機管局主席黃保欣、「體育沙皇」沙利士及「娛樂大亨」邵逸夫，佢話當年委員會成員鄔維庸喺審議後向佢「通水」，話因為民主阿婆嘅反對，四人名單中只有佢不獲通過，據聞當時民主阿婆仲好唔畀面話：「呢啲校長（康叔）大把啦！」
不過，當年老董認為康叔為香港回歸長期付出好大貢獻，所以否決咗民主阿婆嘅建議，一錘定音將康叔嘅名補番落授勳名單，所以康叔笑言呢個大紫荊勳章係失而復得嘅。康叔喺著作中又提及最近熱議嘅「鐵三角論」，並首度披露佢曾經認為前教統局局長李國章可以競選特首。
三次叫大家睇《東方》專欄
被問及下屆特首人選，康叔尋日喺新書發布會上，寄語參選者要有承擔，而非獲取利益嘅「抽水」之人；佢又提到中央睇唔通香港今後發展嘅前瞻性，所以好多後遺症逐步浮現，暴露好多政治問題。至於特首選舉嘅最新動態，康叔尋日出席活動後至少三次叫大家睇佢今日喺《東方日報》嘅「以文會友」專欄，大家要密切留意喇！