政情：搞天體沙灘謝偉俊傾下先
天體沙灘喺外國好受歡迎，但香港就未有。香港人體藝術協會會員之前去完法國天體之城Cap d' Agde考察後心郁郁，想香港都整番個，於是就走咗去旅遊界立法會議員謝偉俊（Paul）嘅辦事處剝光豬請願。雖然阿Paul當年都大膽影過半裸照，但佢面對呢班會員一時間都唔知畀咩反應。
其實阿Paul以前都同白韻琹去過加拿大著名嘅天體海灘Wreck Beach。佢話成個海灘啲人都唔着衫，佢哋着住唔係幾好，所以都一齊「大解放」，覺得幾得意咁話。白姐姐怕阿Paul尷尬，所以偷偷地幫佢影咗張相留念，但白姐姐就點都唔肯畀阿Paul影自己。
雖然阿Paul覺得香港有天體沙灘嘅話，會對旅遊業有幫助，亦可以表現出香港社會開明自由嘅一面，但係要真正推行嘅話會有一定難度，因為中國人凡係牽涉到性都比較保守喎。所以佢會同班議員朋友傾下有冇得搞先向政府反映，費事到頭來得個拗字就無謂喇！