政情：立會新竇爆水管 浸壞電腦

立法會行政管理委員會主席尋日透露，前排新大樓有水管漏水，浸到啲電腦要報銷，認真禍不單行。話說今年五月底，新大樓會議室入面嘅工程房內，天花一條水管出現滲漏，結果積水浸壞咗電子表決系統嘅伺服器，好彩立法會有後備系統，否則真係可以疊埋心水唔使搬都得啦。依家立法會已經叫機電署搞番掂部電腦，水管亦應該搶修咗，總之務求嗱嗱聲整番好。

新機場「前車可鑑」

不過，當年新機場大混亂有辦你睇，正所謂「前車可鑑」，行管會已經自設原則，講明唔能夠為咗趕及死線，連新大樓嘅基本質素都未妥當、隨時發生混亂而強行搬屋。根據條死線，承建商一定要喺下星期，即是今個月底交樓，仲有就係日前議員實地視察之後，所提出嘅交通問題，例如無路直接入新大樓、道路唔太方便殘疾人士、示威區位太細兼位置差等，咁多嘢未搞掂都唔知係咪可以如期交到貨。

就好似駁去新政府總部嘅天橋，政府話條天橋承受到每小時六千人次流量，議員擔心萬一真係咁多人，一齊去逼條天橋咪好危險？點知政府話唔一定六千人都行條天橋喎，完全反映到呢個夕陽政府短視，唔明白何謂「唔怕一萬、只怕萬一」。

其實負責新大樓工作嘅立法會行政管理委員會及秘書處為咗搬家一事，經已絞盡腦汁，由電腦系統、保安，以至到伙食，全部都做咗大量工作，並且請咗搬運公司設計搬屋時間同程序，總之務求做到萬無一失，但事實上做起來真係急唔嚟。

講到尾，都係煲呔曾為求一己私利，要成為立法會新大樓開張後首個宣讀施政報告嘅特首，立法會行管會為咗迎合佢，而冒上好似新機場嘅風險，真係好唔應該囉！