中環出更：陳正欣太太揀殼有一「兔」
手機人人有，若要凸顯個人品味，就全靠與別不同嘅手機殼幫手。卓妮日前喺一個籌款活動上遇到保良局總理陳正欣太太陳慕婷，發現佢有個好可愛嘅藍色立體blingbling兔手機殼，非常搶眼。
陳太話，之前佢見朋友有一個立體傻豹手機殼，覺得好靚，可惜朋友喺台灣買嘅，心諗無理由為咗個手機殼飛過去台灣，所以淨係得個恨字。點知後來佢同囡囡去銅鑼灣行街時，就遇到呢個立體blingbling兔手機殼，於是二話不說就扑錘購買。
話說陳太呢個手機殼要成四位數字先有交易，但間舖向佢承諾如果機殼啲閃石甩咗嘅話，可以隨時攞番去修補喎，加上陳太最鍾意白兔，而機殼又夠大，放喺手袋入面都唔怕搵唔到。其實乜嘢理由都假，最重要嘅係陳生都讚個手機殼靚嘛！
卓妮