中環出更：企業二代齊撐香港品牌
港產名牌，近年人氣急升，「Made in Hong Kong」唔再係次一等。由香港品牌發展局推動嘅四個品牌選舉，尋日拉開戰幕，城中多位企業二代撐場。品牌發展局主席陳淑玲（Shirley）話，難忘「華麗園」彈牙雲吞麵，李錦記太子爺兼品牌發展局副主席李惠中（Charlie）就鍾情「梁蘇記」雨傘，認真長情。
創立成功品牌，富二代亦要絞盡腦汁。Shirley爸爸係長江製衣創辦人陳瑞球，家族喺七十年代引入美國牛仔褲品牌「威格」，名噪一時。通脹來了，佢話廿年來工資升幅驚人，相反，時裝就愈賣愈平。
黃傑龍批競爭法含糊不清
醬油太子爺Charlie都驚訝，大豆價格近年急升四、五成，要買定大豆期貨做套戥。去年喺「香港新星服務品牌選舉」中摘星嘅「御苑皇宴」老闆黃傑龍就慨嘆飲食業「四面楚歌」，除咗食材價格不斷加，業界都關注「競爭法」隨時殺埋身。
佢尋日以稻苗學會主席身份出席立法會競爭法草案公聽會，批評條例涵蓋範圍含糊不清，官員無主動接觸業界解釋，恐怕法律一旦實施，香港隨時淪為訴訟之都。
卓妮