中環出更：保良祭關帝典禮 梁寶珠代龐太主持
保良局尋日舉行一年一度嘅關帝誕祭祀典禮，根據過去傳統，一向論資排輩由主席負責帶領祭祀儀式，但今年就由副主席梁寶珠負責，但現屆主席龐盧淑燕卻在場，何解呢？原來龐太係基督徒，礙於宗教關係，唔可以對住關二哥嘅畫像鞠躬同上香，所以要搵人暫代。但龐太話為咗尊重保良局敬仰關二哥嘅傳統，點都要現身撐場！
龐太又話，關二哥係中華文化上忠義嘅象徵，同保良局救助婦孺於水火嘅宗旨不謀而合，所以保良局每逢關帝寶誕，都會預備三牲果品去致祭，雖然儀式簡單，但係一眾董事會成員，甚至歷屆嘅主席總理都會到場向關二哥致敬。
除咗龐太同梁寶珠外，卓妮喺現場仲見到副主席鄭錦鐘、四太梁安琪、總理郭羅桂珍及陳正欣等，相當捧場。
四太愛琴海度假避示威
四太梁安琪尋日戴住副大黑超現身，睇落消瘦咗，但佢話係素顏畀人嘅錯覺喎。其實四太都講得啱，事關佢啱啱同啲仔女去土耳其同希臘度假返港。
卓妮問四太喺希臘有無遇上示威？佢話早已經收到風，知道希臘因為財政問題搞到亂晒龍，所以對希臘首都雅典敬而遠之，只係去咗愛琴海啲小島玩吓，玩得安心又愉快。
卓妮