【本報訊】無綫劇集《真相》前晚出現了兩次「仆街」，有家長不滿時下電視劇集愈來愈粗鄙，擔心教壞小朋友，並質疑電視節目何以有粗言穢語。廣播事務管理局收到九宗投訴，無綫解釋是「劇情所需」。
《真相》前晚一名扮演警員的角色有以下對白，「我哋成班伙記已經喝住佢，但係嗰條仆街愈喝愈走，跟住火雞一時心急起上來，掹槍辣低個仆街！」但畫面的字幕所見「仆街」則變成「混蛋」。
對白出街後，引起網民激烈討論，在親子王國討論區，家長「bowling2004」說：「就係因為依家啲電視劇又粗鄙又淫褻，我已經好耐冇睇！一做劇就轉台！最憎嗰啲吓吓攬攬錫錫之後上床，又或者鬧交打交講粗口嗰啲，小朋友睇到慣晒好自然會用喺日常生活入面。」
另一位家長「surewin」也稱：「我聽到都打個突呀，好彩阿仔掛住玩冇聽到。」
廣管局表示收到九宗投訴，會按既定程序處理，查證投訴是否屬實，及有否觸犯法例、牌照條件或業務守則。若表面證據成立，投訴將提交廣管局投訴委員會審議。無綫則稱，沒有收到投訴，在合家歡時段以外，劇集有「家長指引」警告字句，加上劇情所需，有關用語可以出街。