本來呢，假如閣下係姓曾，而且冇懵到上心口唔記得老竇都係姓曾，應該會覺得光宗耀祖，事關本地政壇滿坑滿谷都係曾氏宗親會尊貴成員。曾氏一族子弟兵團個個大名鼎鼎，曾蔭權啦，曾俊華啦，曾偉雄啦，曾德成啦，曾鈺成啦……真係多到十隻手指都未必數得晒。
之不過可惜吖，由於曾蔭權民望跌到祖宗都覺得顏面無存，連累到曾門上下個個焦頭爛額，今時今日姓曾唔係幾過癮㗎咋。更加搞鬼嘅就係，有一個姓曾嘅長老級人物不留情面拋出「仆街論」，大有藤條炆豬肉執行家法之勢。前全國人大常委曾憲梓係咁講嘅：「準備出嚟參選行政長官，就要有畀人鬧到仆街嘅思想準備！」另外又明褒暗貶，曾憲梓認為曾蔭權就算被鬧到仆街，都會盡心盡力完成任期。如果翻譯成淺白嘅街坊語言，等於鬧到仆街都賴死唔走。
曾蔭權民望跌到何等田地呢？最新港大民意調查結果顯示，今年七一遊行之後，特首評分處於危險線。曾蔭權現有支持度只有四十五點六分，創出上任特首以來歷史新低。政務司司長唐英年嘅支持度係四十六分，民望淨值首次錄得負數。財政司司長曾俊華嘅支持度係四十四點九分，亦係上任以來嘅新低。
民意研究計劃總監鍾庭耀就話嘞，民望下跌相信同處理替補機制立法有關，如果趨勢持續落去，特區政府將會出現管治危機。
喂喂喂，政府幾大巨頭嘅民望全部低得可憐，其實毋須持續落去，家陣已經處於管治危機啦。試想想，七一遊行當日不知幾多人怒吼「曾蔭權下台」，呢個唔係管治危機又係乜呢？
吖，煲呔曾嗰一句「民望於我如浮雲」可能確係肺腑之言，因為有一件事反映「曾浮雲」完全冇意圖提升一己民望。僭建風暴牽連大量權貴之後，環境局副局長潘潔終於搵人拆屋，偏偏曾氏祖屋仍然原封未動，知法犯法嘅業主似乎無意清拆僭建物。照咁睇，特區之首視民望為無物應該係真嘅。
之不過咁，你當民望冇到啫，民望低殘仍然有客觀效果。打個譬喻吖，你上得山多，發雞盲見唔到老虎啫，唔代表老虎唔會撲過嚟吞你落肚。即係咁，功夫茶相信董建華腳痛其實係「被落台」，冇人夠膽保證煲呔曾唔會他朝君體也相同。
計功夫茶話齋，曾憲梓可能講漏咗少少，除咗要有畀人鬧到仆街嘅思想準備之外，民望低處未算低嘅「仆字輩街霸」更加要做好另一個思想準備，小心學似老董「被腳痛」呀！