《競爭法》勢必成為泛民和建制派角力新戰場，支持法案的泛民同反對法案的商會及大部分功能組別議員，各自私下同公開發功。尋日先有香港各界商會聯席會議刊登全版廣告，要求撤回《競爭法》，而泛民則計劃明日向商務及經濟發展局局長蘇錦樑（Greg）「施壓」，要求政府一定要如期於明年通過草案。
據聞今次泛民與Greg蘇會面，政治姿態多於實際，眼見近日各大商會不斷「跳出嚟」反對法案，Greg蘇同泛民分享過佢嘅擔憂，於是有聽日嘅會面，證明支持《競爭法》大有人在，泛民仲打算會後發表聲明，力爭明年要通過草案，絕對不能撤回。
商會近月不斷叫價，要求法例「剝晒牙」為止至心息，但泛民認為，任何削弱執法效果嘅修訂都唔會接受，佢哋又擔心，距離本屆立法會任期完結只有一年時間，但審議法案進度太慢，令人擔心最終會胎死腹中。總之Greg蘇擔正後初試啼聲之作，睇嚟都好難搞得掂。