政情：劉迺強憶與肥龍辦報
香港大學係港產名牌大學，城中名人好多都係港大畢業，想當年佢哋嘅學生報《學苑》亦都係「粒粒星」。港大畢業嘅基本法委員會委員劉迺強尋日喺電台節目話當年時，就大爆前政務司司長許仕仁（肥龍）都有參與《學苑》嘅工作，但美其名為「出版秘書」，查實就係負責「睇水」喎。
劉迺強話，以前《學苑》可以話係社會輿論嘅先鋒，連當時嘅主流報紙都會用佢哋嘅文章，甚至《學苑》未印刷已經有人去印刷廠度偷文章。嗰陣仲係港大學生哥嘅肥龍做出版秘書，肩負兩大重任，包括睇住份學生報防止畀人偷咗去，另外就係監督份學生報。劉迺強笑稱︰「印啲乜嘢一出事，佢（肥龍）就要坐監，所以我哋好錫佢。」好明顯啲豬頭骨都係肥龍啃晒。
劉迺強講起一齊搞《學苑》嘅同學，就話自己入大學有兩大成就，第一就係識咗班好好嘅朋友，大家會一齊討論吓國事，對佢嘅成長好緊要。咁第二大成就係乜呢？佢就好鬼馬咁話，係搵到個老婆囉！