政情：李明逵：退位要懂得放低
香港人嘅人均壽命愈來愈長，換言之大家都有機會面對漫長嘅退休生活。衞生署就出書教大家如何面對退休生活，退休幾年嘅前警隊一哥李明逵獲邀介紹呢本新書，佢話退休人士心理上嘅適應好重要，尤其係執掌高位嘅人，更要明白在位時候所得到嘅支持或享受嘅待遇，一旦離開崗位就會全部消失。前一哥呢番說話真係啱晒就嚟落台嘅煲呔曾聽。
李明逵坦言，雖然佢做處長嘅時候就已經為退休做準備，但喺退休初期仍然改唔到警隊工作嘅習慣，一聽到社會有事發生就會好肉緊，所以要經常提醒自己已經唔係一哥喇！至於會否出山搵真銀？佢話自己開支唔多，份退休金已經好夠使，況且擔任受薪工作會有來自僱主嘅壓力，倒不如得閒做吓義工，輕輕鬆鬆，連頭髮都黑番啲。
有份出席介紹新書嘅衞生署醫生文麗話，以本地女性計算，二○○九年嘅人均壽命預期係八十九點五歲，對一個六十幾歲退休嘅人士來說，想安享晚年就真係要好好策劃喇。