政情：議員轟添馬艦路不通
搬新屋係令人興奮嘅事，但係立法會好快就搬去添馬艦開會，議員至發現嗰度樣樣都唔妥。十六位議員尋日實地視察地盤，職工盟立法會議員李卓人喪插，話將來遊行人士要經天橋去添馬艦，擔心大家要上樓梯或者自動電梯，人多起嚟好危險。連親建制嘅經濟動力立法會議員梁君彥都話，人數多嘅時候真係封路先掂，淨係靠畀兩條天橋唔得㗎。
有議員又不滿既然行政、立法獨立，點解去新大樓一定要先經新政府總部呀？亦有意見話由金鐘地鐵站行入去，條路有啲斜，唔係幾方便坐輪椅嘅人，仲有示威區干擾咗議員出入，人多起嚟管理又有困難。有議員建議喺中信大廈起條橋直入新大樓啦，點知政府話要經研究、諮詢同刊憲等程序，起碼都兩年喎。
今次主責添馬艦嘅行政署署長麥綺明真係吟詩都吟唔甩，不過其實大樓嘅設計，議員由頭開始都睇到實，如果議員眼光長遠啲，有更強嘅預見問題能力，咁就唔使靠政府喇。呢個政府，靠唔住㗎嘛。