中環出更：黃傑龍留學食鴨解鄉愁
享受鴨肉美食，片皮鴨是首選。叙福樓集團執董兼稻苗學會主席黃傑龍（Simon）係超級片皮鴨迷，佢十多年前留學澳洲，每逢思念香港，就拉埋同樣在當地留學嘅妹妹Amy，喺唐人街酒家食鴨止思鄉。
有日Simon就去咗老友陳嘉華間酒家歎片皮鴨。原來太子爺陳嘉華係炮製燒味嘅高手，佢吩咐大廚精心炮製熱烘烘嘅廣式片皮鴨、燒味拼盤、鮮斑球米線等佳餚。
為嘗佳餚 省吃儉用
Simon指定要配上清甜葱段、紅椒圈及甜麵醬，用溫暖麵餅包裹成卷。放入口，香酥鴨皮化成香濃鴨汁，濃而不膩。Simon唔理卡路里超標，一口氣食十二件。佢話，回想當年留學生涯，佢同妹妹寧可省吃儉用，每月也要品嘗一次片皮鴨，飯後仲將鴨殼打包，拎返屋企煮公仔麵，滋味無窮。
學成歸來後，佢輾轉幫爸爸打理家族飲食生意，片皮鴨係順手拈來，但為咗健康，只可偶一為之。
公職多多嘅Simon，八月將去美國充電，與家人坐迪士尼郵輪去阿拉斯加，並喺郵輪上同太太及囡囡齊吹蠟燭慶祝佢生日。咁啱得咁翹，艘郵輪當年係八月十五日下水，同佢同月同日生，真係有緣。
卓妮