火燭呀！救命呀！執生呀！
咦，邊度火燭呢？咪就係蜚聲國際嘅尖沙咀彌敦道重慶大廈囉。呢一幢大廈確係非常之咁出名，一來住滿來自全球各國嘅嘉賓旅客，二來咯喎，一齣電影《重慶森林》令到萬千影迷為之瘋狂，不知幾多外國朋友慕名朝聖。相信唔少本地同胞都曾經遇過老外問路：Where is Chungking Mansions?
尋日下晝喎，重慶大廈Ａ座七樓一個單位發生火警，消防員灌救半小時將火救熄。火警導致十幾人吸入濃煙不適，大廈住客滾水淥腳疏散。不幸之中有大幸，呢一單唔係奪命大火，重慶大廈唔似得土瓜灣馬頭圍道唐樓咁造成四屍五命慘劇。
因乜事幹要同馬頭圍道大火相提並論？係咁嘅，消防懷疑重慶大廈起火單位係劏房，業主將一千呎單位分成五間房，影響消防員灌救，交由屋宇署跟進。你知啦，馬頭圍道大火同劏房問題有關，走火通道嚴重受阻，住客走投無路之下葬身火海，包括一位捨身救妹嘅中七女生謝茵怡。
尖東區議員關秀玲就話嘞，重慶大廈有三分之一係無牌賓館，而且有好多劏房，批評政府監管不力。關秀玲又話，出事樓層平時嘅走火通道有好多行李雜物。
呢嗱嗱嗱，政府監管不力呢家嘢真係害人不淺，賓館既無牌又劏房，屋宇署等等相關部門點解唔取締呢？今次大話夾好彩啫，重慶大廈雖然燒出禍，不過冇死人，下次再整多一鑊馬頭圍道大火點算呀？
發展局局長林鄭月娥冇耐之前話喎，正在研究修訂現行法例，將多種常見劏房工程納入小型工程監管制度，以免劏房影響走火通道，爭取明年首季向立法會提交條例草案。
唉，劏房問題十萬火急，一場火燭隨時死傷枕藉，點不知民急官不急，明年首季先至向立法會提交條例草案，仲要係爭取，並唔係一定。功夫茶真係想問一問號稱好打得嘅林鄭局長，爭取明年首季先至出糧畀你，得唔得呀？假設冇糧出嘅局長淪為劏房住客，仲係窮到冇飯開嗰隻，爭取明年首季先至煮飯仔畀你食，又得唔得呀？
講真，功夫茶打死都唔信現行法例唔可以取締劏房，問題只係政府願唔願意執法。正如僭建，係人都知犯法㗎啦，林鄭月娥居然仲要同新界鄉紳講數，簡直愧對立法會大樓上面嗰一位法律女神。
總而言之一句講晒，取締劏房不容繼續拖拖拉拉，假如再釀成奪命大火，林鄭月娥落台謝罪十次都唔夠！