政情：神童畫家獲男拔取錄
喺國際屢獲殊榮嘅神童畫家劉見之，嚟緊九月將入讀傳統直資名校拔萃男書院附屬小學，同前財政司司長梁錦松及前跳水王后伏明霞嘅寶貝囝囝皓嘉做同學。尋日拔萃男書院校長張灼祥透露咗呢個好消息，仲自爆揀咗見之嘅畫作做佢本新書《徐行》嘅封面添！
張校長尋日心情靚絕，事關學校實施頭髮驗毒計劃嘅成效唔錯，加上辦學成績一向有目共睹，城中名人嘅仔女依然爭崩頭報讀，校長自然開心啦！講起嚟緊新學年就讀小一嘅名學生，除咗梁錦松同伏明霞囝囝皓嘉之外，去年以畫作「虎」揚威國際嘅小畫神劉見之，九月都將會入讀小一。
校長非常欣賞見之嘅才華，事關佢啱啱出版嘅散文集《徐行》，揀選唔同學生嘅畫做插圖，見之仲未入學，畫作就被校長選中做新書封面，可見校長有幾惜才。本散文集不乏充滿童趣嘅畫作，確係令人愛不釋手。