市民遇疑難可以搵議員傾，議員有投訴又可以向邊個反映？話說立法會海濱規劃事宜小組委員會喺今年四月底遠赴美加考察，睇吓當地嘅海濱規劃，點知本港駐紐約嘅經濟貿易辦事處職員，斗膽怠慢咗尊貴嘅議員們，所以有議員趁尋日財務委員會討論駐外辦嘅租金津貼撥款，即場向商務及經濟發展局常秘黃灝玄大吐苦水。
身為美加團團長嘅專業會議議員劉秀成投訴，點解唔同地方嘅駐外經貿辦，竟然有唔同嘅接待方法？佢大讚加拿大嘅經貿辦職員招呼周到，但駐美國紐約嘅職員就反應冷淡，連立法會秘書都感驚奇，點解當地啲職員咁唔幫得手，而且有團員要佢譴責呢位職員。
面對議員連番批評，黃灝玄就死撐話，其實當地經貿辦職員已盡量幫助外訪議員，但經貿辦始終主責經貿，人手又唔多，所以有時未必樣樣議題都幫到手喎。老實講，普通市民喺外地有事，經貿辦都有份支援，呢次佢哋咁樣招呼班議員，又好難怪議員咁興嘅。