政情：立會大懶蟲調位遮醜
做人最緊要係知錯能改，但有錯唔改仲要掩飾走精面，確係厚顏無恥。每年班立法會議員出席率埋單計數，大懶蟲議員排行榜中，霍震霆（Tim霍）同李國寶例必係座上客，兩人不時爭一日之長短。遲啲立法會搬家之後，佢兩位大懶蟲被編配坐埋一齊，據講李國寶為免同Tim霍一齊唔開會，於是決定同詹培忠（金勞詹）調位，希望同Tim霍分開坐，唔使搞到出現兩張空櫈咁肉酸。
之前我哋講過，「五散人」之一嘅保險界陳健波為免被坐喺後排嘅長毛梁國雄大聲講嘢嚇親，於是同另一散人醫學界梁家騮調位。尋日立法會又出咗張通告，話李國寶已經申請咗同金勞詹調位，而工聯會王國興同黨友黃國健（KK）亦都對調座位。按照最新座位表，李國寶由死角位調到最前排，代替金勞詹同旅遊界謝偉俊一齊坐。
我哋問過金勞詹，佢透露原來係李國寶唔想同Tim霍一齊坐，費事兩個一齊唔開會，出現兩張空櫈嘅場面。真係講出嚟都無人信，唔通分開坐就改變到現實咩？將來李國寶坐咗係前排，唔開會相信仲顯眼，反而Tim霍繼續留守死角位置，就算佢真係唔開會都無咁覺眼。李國寶嘅諗法確係掩耳盜鈴，最慘係謝偉俊同金勞詹一齊坐得好哋哋，未來一年就被李國寶拆散咗。
王國興避長毛 苦了KK
至於工聯會兩子調位，原來又係同長毛有關。話說長毛坐喺王國興隔籬，點知王國興頂長毛唔順，可能係唔想雙方擦槍走火，所以佢申請同KK調位。非常之「順德人」嘅KK見王國興提出咁嘅要求，一口就答應調位之事，其實KK都唔係好想坐喺長毛隔籬，不過佢比較睇得開，仲笑笑口話怕且將來開會，要戴定一對游水用嘅耳塞喇。
距離立法會大樓搬家嘅日子愈來愈近，好似調位呢啲小枝節相信亦會愈來愈多，所謂見微知著，從呢啲小事可以睇到唔同議員之間嘅互動關係，相當有趣。不過，好似李國寶呢啲斬腳趾避沙蟲嘅調位屎橋，莫講話小朋友千祈唔好學，連議員都唔應該去倣效。