中環出更：99年歷史前身最高法院
立法會大樓好快就會完成佢嘅歷史任務。位於中環昃臣道八號嘅立法會大樓，於一九一二年落成啟用，至今已有九十九年歷史。大樓原本係最高法院所在地，第二次世界大戰日本佔領香港期間，曾經短暫作為憲兵隊總部，一九七八年地鐵施工引致大樓出現裂痕而關閉復修改建，八五年重開後，正式成為立法局大樓，亦標誌住立法機關第一次引入選舉成分，回歸後亦改稱為立法會大樓。
將改作終審法院
大樓嘅設計就糅合咗中西建築元素，既有象徵古羅馬及希臘嘅拱頂，又有中國祥雲圖案設計，古典嘅建築風格，早已成為中環街頭嘅一大特色。隨着立法會遷出，大樓將搖身一變，成為終審法院。