領匯加租七成趕絕商販

寶達邨位於秀茂坪附近，但位置較為偏僻，為免受舟車勞頓之苦，不少邨內長者及居民多選擇在邨內街市購買餸菜。不過早前陳伯卻發現寶達街市有接近一半檔戶相繼結業，可供選購物品不斷減少，價格亦開始上漲，「肯定領匯又加租啦，我哋呢啲小市民睇嚟有排捱！」

當區區議員洪錦鉉證實，寶達街市在轉換外判公司後曾經進行「大重組」，第一步更是大幅加租，「領匯根本就係想逼走晒啲小租戶，再將啲舖租畀佢哋嘅目標商戶！」洪指發現不少租戶均因抵不住大幅加租而選擇離場，其中一間麵店便因租金由三萬元上調至逾五萬元而黯然離場，「佢哋寧願蝕本賣晒啲器材都唔想捱貴租去博回本，你話問題有幾嚴重！」

洪錦鉉指本來客似雲來的麵店因租金由三萬加至逾五萬元而決定離場。

寶達街市內不少租戶因不敵租金壓力而離開。

小租戶肉隨砧板上

領匯未有就大幅加租事件回應查詢，僅交由街市外判承辦商作出回覆。承辦商發言人承認，接手街市後租金上曾作出調整，但強調有關調整經過協商，並維持於合理市場水平。

發言人又稱，街市現有檔位的出租率約有八成，食物及貨品種類供應仍然充足，但就租金上調幅度，發言人則拒絕透露。

「小租戶根本係肉隨砧板上，完全冇議價能力，咁都叫係經協商調整，有冇搞錯！」洪錦鉉指街市陸續有不少新商戶遷入，但在新租金壓力下，有部分即使已簽妥新租約的舊商戶亦選擇放棄而離開，洪擔心類似情況會繼續發生，令居民變成最終受害者，「留喺度嘅租戶都係博吓個場會轉旺，可以賺到錢，但係啲租咁貴，真係唔太樂觀！」

立法會議員陳淑莊則力斥領匯未有體恤市民需要，任由營辦商大幅增加租金，「屋邨街市舖竟然收中環價，你叫人哋點做落去呀？」陳又認為，領匯選擇拒絕回應傳媒查詢，僅交由外判商回覆，大有圖將責任推卸予外判商以逃避責任之嫌，「根本就係拎外判商做擋箭牌，個場係領匯嘅，加租點會唔關佢事？」陳淑莊促領匯須就事件反省，並顧及小市民及租戶利益。

居民心聲 林先生：「咁加租法，根本就係要逼走啲畀唔起貴租嘅商戶，賺錢都唔使賺到咁盡吖！」

陳先生：「我日日都喺度買嘢，見住啲嘢一路咁貴好無奈！」

記者：林永發