少用膠袋，挽救地球，呢個本來係非常崇高嘅環保概念，理論上冇乜邊個會反對。之但係有一個問題，人都係貪方便㗎啦，買嘢唔用膠袋有時候確係幾鬼麻煩。所以咯喎，利用立法手段減少使用膠袋基本上係冇錯嘅。
好嘞，政府實施俗稱膠袋稅嘅膠袋徵費政策已經兩年幾，有乜嘢成效冇呀？表面上好似有效，實際上就真係不敢恭維咯。塑料袋業廠商會訪問膠袋生產商，發現膠袋徵費之後，背心膠袋以及手挽膠袋嘅生產量分別下跌七成同兩成，而不織布袋就上升九成六，垃圾袋升六成三，預先包裝袋嘅生產量升一至三成半，整體塑料用量反而增加兩成七。
商會代表就話嘞，不織布袋較膠袋使用嘅塑料多幾十倍，大大增加堆填區嘅壓力，而政府又冇提供津貼回收不織布袋。商會建議政府撤銷膠袋徵費，效法外國推行完善嘅膠袋回收制度。
嗱嗱嗱，你話係咪弊傢伙？膠袋徵費嘅原意係寓禁於徵，點不知弄巧反拙，莫講話無助於挽救地球，反而落井下石踩多幾腳。呢家嘢，或者可以稱之為特區政府嘅管治特色，永遠好心做壞事，硬係撞板多過食飯。
所謂不織布袋，亦即係一般嘅環保袋，因乜事幹生產量會上升九成六咁交關嘅呢？一大原因就係香港嘅環保政策太多漏洞，官老爺話用膠袋要畀錢吖嘛，數口精嘅港人同胞咪改用環保袋囉，之不過唔係次次都用同一個環保袋，而係呢邊順手攞一個，嗰邊順手又攞一個，攞埋攞埋屋企唔知有幾多個。塑料袋業廠商會講得啱呀，政府冇提供津貼回收不織布袋吖嘛，結果就造成大量浪費嘞。
吖，講到呢度有一樣嘢要補充，環境局副局長潘潔話喎，政府現正就擴大膠袋徵費諮詢公眾，期望市民踴躍發表意見，諮詢期至八月十六日。本來呢，環保政策弄巧反拙已經激鬼死你，家陣再由一個知法犯法嘅高官同你講擴大膠袋徵費，真係唔知好嬲定係好笑。你知啦，一場僭建風暴揭發潘潔香閨都有法例不容嘅僭建物，大家可能會產生疑問，市民即使踴躍發表意見，潘潔會唔會刻意歪曲㗎？既然僭建犯法都可以理解為冇問題，咁嘅官僚可信程度大打折扣啦！
如果潘潔真係誠心誠意要諮詢，功夫茶不妨發表一項意見。即係咁，笨官無助救地球，好心環境局一眾官僚用下腦啦，必須切切實實諗辦法回收不織布袋，否則咯喎，戇得相當膠嘅膠袋政策繼續損害環保就眼冤啦！