政情：季詩傑忽然IT爭選委
本身係律師嘅季詩傑，雖然已經退出社民連，暫時係無黨派人士，不過佢對選舉仍念念不忘，早前有傳佢會再次參選區議會，但其實阿季已另有打算，諗住「升呢」參選年底嘅選舉委員會選舉，喺特首選舉中投票，不過唔係從法律界出選，而係去大纜都扯唔埋嘅IT界。
阿季自爆，佢早排已經登記成為IT界嘅選民，自然有資格參與選委，至於點解「忽然IT」，佢強調話自己曾係互聯網專業協會（iProA）成員，所以都算係半個IT人。但係泛民嘅莫乃光就話，未聽過季詩傑想做選委，近排亦無同佢接觸，但至於泛民喺選委會搶位，佢話唔會嫌多，只要係泛民嘅人就得，現時亦煩惱緊點樣先湊夠數，組成一條三十人名單。
其實季詩傑自己都係律師，大可以去選法律界選委，但點解佢要轉戰IT界呢？有法律界人士透露，話班選委大部分都係公民黨人士，一向自己玩多過受埋其他人玩。而且全部都係大律師，唔係律師，所以同季詩傑無乜聯絡。