政情：李匡晉「洗底」撐的士業
前日有班的士大佬跳出嚟開記者會，不滿車商喺的士起錶加價後，車租即時加價，仲話唔排除搞的士堵塞中區行動。咁識玩政治抗爭，原來記者會主角之一嘅的士司機權益會會長李匡晉，大有來頭。李匡晉承認，佢就係當年犯盜竊罪因而坐過一年監嘅前觀塘區議員李廷傑。
已經係過去式嘅「李廷傑」，一九八二年至二○○○年做觀塘區議員，一九九六年訛稱可為小販競投街市攤檔，將十二名小販交託競投嘅一百萬元訂金，私自作個人投資，佢最終被裁定十二項盜竊罪名成立，被判囚一年。當年民建聯陳鑑林都有份為佢寫求情信。
唔想再回首往事嘅李匡晉，如今係租車的士司機。佢話，雖然放下議員一職，但係仍然透過工會會長身份，為的士同業爭取權益，同樣可服務社會。佢有卅幾年的士牌，又話自己已一把年紀，冇諗住再戰江湖再參選。
當年曾經係親台嘅港九工團聯合總會嘅李匡晉話，原來如今已經係高喊「票債票償」嘅人民力量成員之一，但並非中堅分子。