政情：范太：不知民所需可以「摺埋」
煲呔曾早前喺行政長官答問大會度話有人「抽水」批評政府，行政會議召集人梁振英隨即反擊。全國人大常委范徐麗泰尋日就話，抽水與否都係口舌之爭，反而提出新觀點，就係「參政嘅人如果到目前都唔知市民要啲咩，可以摺埋喇。」睇嚟「摺埋」好快成為政壇潮語，大家會去睇吓邊個疑似特首候選人，喺近期內要「摺埋」。
范太尋日出席一個粵劇籌款活動，被問及煲呔曾話有人抽水，范太話佢覺得抽水論好無謂，因為都係口舌之爭，至於邊個抽水，范太就話「好似唔關我事」，皆因自己唔係香港公職人員，又唔係香港建制內嘅人，更唔係現屆政府團隊中人，不過佢講嘢都會比較小心，因為自己係人大常委，費事講咗啲嘢引人誤會。
不過范太就點醒所有疑似候選人，話唔好低估港人智慧，香港人唔會因為你講咗啲咩說話就會覺得你好，講出嚟要做到，皆因講就係人都識，佢話：「市民要啲咩好清楚，參政嘅人如果到目前都唔知市民要啲咩，可以摺埋喇。」