政情：田二少玩直選排錯隊
亂咁噏「懲罰選民」而噏出禍嘅九龍西立法會議員梁美芬，家吓真係心慌慌，因為十一月區議會選舉同明年九月立法會選舉就快殺到，佢近日技驚四座嘅言論，已嚇走唔少選民，佢成為近日政壇討論嘅熱點，但有分析認為，成件事嘅大輸家除咗佢，其實仲有○八立法會選舉同鼠王芬爭崩頭嘅田北辰，認為如果二少如今仍然留守九西嘅話，下屆應該都可以踢走鼠王芬，但可惜二少如今「排錯隊」，轉戰新界西幫新民黨拓荒。
大家都明白，鼠王芬當年當選，建制派動員起咗唔少作用。但早排有工聯會消息人士就流晒口水咁放風，話想派人出戰九西，擺明要攞番當日畀鼠王芬啲選票。平日低調嘅勞聯立法會議員李鳳英，上周唔執輸話勞聯要走直選，劍指九西。民主黨亦派出黃碧雲，打算踢走鼠王芬，喺十一月區選搶走九龍城區議會黃埔東呢個地頭。總之一句講晒，政客們都想「鬥執」鼠王芬跌出嚟嘅選票。
畀葉劉封後路
已經「改嫁」入咗新民黨嘅田二少今回真係「呻笨」。○八年，田二少揸住自由黨支旗去九龍西參選，佢同鼠王芬同時向西環尋求支持，雙方一度拔河，各不相讓，結果田二少獲得一萬三千幾票，輸畀鼠王芬近七千票，西環將選票畀咗邊個，一睇就明。田二少○八年落敗之後，佢都掙扎咗一輪，至決定落腳新界西。如今鼠王芬「懲罰選民論」幾乎令自己一鋪清袋。所以，有分析話田二少明年若再戰九西，機會比○八年好好多。
我哋就會唔會轉區問過田二少，佢話「好多謝呢啲分析」，但佢冇講明年立法會會去邊區參選，總之一句專心做好地區工作。
不過佢嘅黨主席葉劉淑儀就似乎為佢封晒後路，斬釘截鐵話新民黨唔會做機會主義者：「唔可以等人撞板就走去搶位……要我們新民黨執鼠王芬二攤，呢啲唔係大丈夫所為，講出嚟都唔好聽！」當今政壇仲有大丈夫，好！
至於事件「終極主角」鼠王芬，聽到呢啲「人情冷暖」嘅局勢分析，唔想多作回應，除咗「我會繼續做好地區工作」嘅官方答案外，其他都一概拒評。選票唔呃人，鼠王芬有冇失去選民支持，三個多月後嘅區選，就有答案。
話時話，鼠王芬早前將獲演員支持嘅相片放上facebook，惹起各方質疑佢聘請演員支持自己，尋日所見，有關相片已經唔見晒喇。